قدرات الطفل الابداعية خطوات نحو تنميتها

اخواتى الحبيبات
من اول ما ربنا بيكرمنا بالحمل واحنا بنفكر ازاى نساعد البيبى دة على نتمية مهاراتة .. ازاى نساعدة على نتمية ذكاؤة
طبعا انا بتكلم على اليوم العادى واحنا قاعدين فى البيت
الحاجات اليومية اللى بنعملها معاة وبننمى ذكاؤة بيها
زى اية ؟؟؟!!!!!

لازم الطفل يحس بالحب والحنان من الام والاب وكمان يحس بتقدير الذات ودة اول الخطوات اللى بتخلية يحس بالثقة بالنفس

طبعا لازم مننساش الفروق الفردية بين الاطفال
يعنى لو عندك اكتر من طفل متفضليش تقارنى بيهم او حتى لو مقارنة بين طفلك واطفال الجيران او اطفال العيلة
"اخوك عمل كذا وانت لأ" ... " شفت ابن عمك جاب درجات اكتر منك فى الامتحان " ... " جتك خيبة بنت خالتك اشطر منك "
لأن طبعا حاجات زى دى بتأثر فى نفسية الطفل جدا وبتحسسة بالاحباط وانة مهما عمل مش هيوصل للمرحلة اللى امة عايزاها لأنها شايفة حد احسن منة

لو انتوا قررتوا انكم تخرجوا فى يوم
خدى رأى ابنك فى المكان اللى هتخرجوا لية " اية رأيك نخرج نتفسح النهاردة فين " او اية رأيك فى ....... "
او مثلا انة يختار ملابسة لوحدة
يعنى لما تاخدية على المحل سيبية يختار هو اللى هو عايزة ... لو مناسب كان بها لو مش مناسب حاولى دايما تخيرية بين اكتر من حاجة... دة بيخلق عندة نوع من الاستقلالية والاعتماد على الذات

حاولى دايما تشغلى طفلك بالالعاب اللى بتعتمد على الاستكشاف والتفكير وتنمية المهارات ... ودة بدل ما يقعد طول النهار قدام التلفزيون
زى العاب البازل والمكعبات والقص واللزق وغيرها من الالعاب اللى الاطفال بيحبوها
هتشغل وقتة ولو حلها لوحدة او كون شكل لوحدة طبعا مش عايزة اقولك على عبارات المدح والثناء علية وانة شطور وذكى

الطفل طبعا خيالة واااااااااااااسع
اوعى حذارى ييجى فى مرة يقولك على حاجة وتقولى لة " اية الكدب دة " او " بطل كدب" او تحسسية انك مش مصدقاة
اسمعى لة وبإنصات كمان ... معظم الحاجات اللى بيرسمها الطفل بخيالة وبيحكيها بتبقى حاجات بتدل على مكنونات جواة
او حاجات بيبقى عايز يعبر عنها ومش عارف فبيلجأ للخيال اللى بيعرف يتعامل معاة اكتر من الواقع ...
وهو طبعا مع الوقت هيعرف الصح من الغلط بس هيكون نمى خيالة الابداعى وبقى عندة قدرة على الابتكار بعد كدة هيوظفها صح ان شاء الله

حاولى دايما متقدميش لطفلك الحلول الجاهزة ... خلية هو اللى يفكر فى الحاجة اللى قدامة
يعنى مثلا لو فية لعبة بعيدة عن ايدة وهو بيعيط علشان ياخدها
متشيليهوش وتخلية يجيبها ...
لأ قولى لة روح هاتها ... او هنجيبها ازاى دى .... خلية بفكر ازاى هيوصل لها وهيعمل اية علشان يوصل
ادى لة فرصة انة يبتكر حلول ... ممكن يجيبها هو بطريقة تانية غير الطريقة المباشرة ... ودة احسن ... معناها انة فكر

حاولى انك تعملى لطفلك من صغرة مكتبة صغنطوطة كدة فى اوضتة ...
فيها القصص اللى بتختاروها سوا وقبل النوم او وقت القصة خلية هو اللى يختار القصة اللى عايزها
علشان يتعود ان القراءة دى حاجة اساسية فى يومة ...
القراءة غذاء العقل وتنمية للمدارك

واخيرا خلى بالك اختى العزيزة
طفلك هو مستقبلك .... احرصى على تأمينة جيدا ...
بالتربية ... بالاخلاق الحميدة ... بالتربية الاسلامية الصحيحة

دمتم بود

التسميات : ألاسرة والمجتمع

روابط هذه التدوينة قابلة للنسخ واللصق
URL
HTML
BBCode